Ny dagleg leiar på ViteMeir

ViteMeir har glede av å presentre Gry Høyheim som ny dagleg leiar i ViteMeir frå 1. juni. Styreleiar Tor Arne Ness er nøgd med både prosessen og tilsetjinga. 

- Gry har ein spennande profil og har gitt oss eit solid inntrykk i tilsetjingsprosessen. Me er trygge på at ho vil komplimentere og styrke teamet på ViteMeir, og bidra til å utvikle vitensenteret vidare. 

Gry Høyheim er utdanna samfunnsøkonom og har dei siste åra jobba med styring og forvalting i departement i Oslo. No er ho og familien på flyttefot heim til Sogn.

-Eg gler meg veldig til å starte i jobben i ViteMeir. Frå første gang eg høyrde om planane har eg fulgt etableringa av senteret. Det verkar til å vere eit godt og spennande arbeidsmiljø, og når denne stillinga dukka opp ser eg på det som ein unik sjanse til å bidra med å utvikle senteret vidare, seier Gry Høyheim.

- Me har skapt eit godt fundament for ein ny leiar å ta dette vidare. Samstundes er me fortsatt nyetablerte og me står mellom anna føre vår første turistsesong, så det er ein viktig fase ViteMeir går inn i framover. Vidare er det kjekt å sjå at serveringsstaden SmakeMeir allereie er vorte ein god møteplass for både besøkande og næringslivet, og eit godt tilbod som komplimenterer ViteMeir, avsluttar styreleiar Tor Arne Ness. 

Velkommen til ViteMeir!